Aaj ki khabar 6.3.2017

مقدمہ قتل: ملزم کو عمر قید اور جرمانے کی سزا کا حکم

6 مارچ 2017

ایڈیشنل سیشن جج ذوالقرنین اعوان نے مقدمہ قتل کی سماعت مکمل کرتے ہوئے جرم ثابت ہونے پر ملزم شہزاد کو عمر قید اور پانچ لاکھ روپے جرمانے کی سزا کا حکم سنایا ہے۔
ملزم شہزاد پر الزام تھا کہ اس نے دیرینہ دشمنی پر اپنے دیگر ساتھیوں طارق، ناصر، محمد فاروق، اکرام اور فخر کے ساتھ مل کر فرمان اللہ نامی شخص کو تھانہ محمد والا کے علاقہ موضع کوٹ سلطان میں فائرنگ کر کے قتل کیا تھا۔
ملزم شہزاد اور اس کے ساتھی قتل کے بعد موقع سے فرار ہو گئے اور مختلف پولیس مقابلوں کے دوران شہزاد کے تمام ساتھی پولیس مقابلوں میں ہلاک ہو چکے تھے۔
شہزاد کو سترہ سال اشتہاری رہنے کے بعد 2015 میں پولیس نے گرفتار کیا اور اسے جھنگ جیل بھجوا دیا۔

Aaj ki khabar 6.3.2017

فاسٹ یونیورسٹی میں ہونے والا سالانہ سپورٹس میلہ اختتام پذیر

6 مارچ 2017

نیشنل فاسٹ یونیورسٹی میں تین روز جاری رہنے والا دوسرا سالانہ بار سلیگو سپورٹس میلہ اختتام پذیر ہو گیا جس دوران مختلف کھیلوں کے مقابلے کروائے گئے۔
اس میلے میں ملک بھر کی انتیس مختلف یونیورسٹیوں کے 200 سے زائد طلبہ و طالبات نے حصہ لیا اور ہر کھیل میں جج کے فرائض نیشنل کھلاڑیوں نے سرانجام دئیے۔
ڈائریکٹر یونیورسٹی آصف محمود گیلانی نے اختتامی تقریب سے خطاب کرتے ہوئے کہا کہ ملک میں اس وقت جہاں دہشت گردی اور خوف کا عالم ہے ایسے میں اس طرح کی تقریبات خوش آئند ہیں۔
انہوں نے کہا کہ ایسی تقریبات دہشت گردوں کو یہ پیغام دے رہی ہیں کہ ہم تمہاری ان چھوٹی چھوٹی کارروائیوں سے گھبرا کر گھر بیٹھنے والے نہیں بلکہ ہم تعلیم اور قلم کے ذریعے تمہارے تمام ارادے اور عزائم خاک میں ملا دیں گے۔
تقریب میں شرکت کے لیے آنے والے طلبا اور طالبات نے صحافیوں سے گفتگو کرتے ہوئے کہا کہ ملک کی تمام یونیورسٹیوں میں ایسی تقریبات کرائی جانی چاہئیں تاکہ طلبا اور طالبات تعلیم سے ہٹ کر غیر نصابی سرگرمیوں میں بھی اپنا لوہا منوا سکیں۔
آخر میں کھیلوں میں نمایاں کارکردگی دیکھانے والے طلبا و طلبات میں انعامات تقسیم کیے گئے۔